Abteilungen und Sparten des Vereins : Wirtschaftsabteilung 1954
Gedicht von Ernst Wahler, vorgetragen zur Jahresabschlußfeier 1954. Nex schöners gibt em ganza Gay, als zwirtschafte, für der Sportverei. de schenscht Eirichtumg weit und broit, hen ihr, hot amol einer gseit. Sgibt gar nex was da net gebe dät vom Mohraköpfle bis zom Schweinebrät. Jeden Dag isch do a andrer Koch, Abwechlung en der Küche, des will mer doch I ka Euch bloß saga, die kennet‘ kocha, mit 10 Pfond Fleisch, de best Supp ohne Knocha. Hoiße Würst, des send so Spezialitäta, narr, wenn dia Krüppl no net platze dätat. Manch starker Ma hört ma beta in der Küche druß, ach, wär doch mei Weib heut druß. Sonscht klappt alles wia am Schnürle: bis uff dr Griff am Ofadürle:. Wia viel hent sich do scho Dfenger verbrennt bloß weil mr koine Schlosser oder Fleschner hend. Ja bis do so a Johr vorbei, do bassiert eba älls so allerloi. Do neilich isch gwä, wann woiß i nemme so recht da hent an a bar wacker zecht, Honger hend se griagt zo schpäter Stond. Wie mr wohl jetz no zo ebbes zesset kommt? Se hend anander aguckt, ond uf jeden Fall, hent se a Kitzle gholt, aus oim seim Stall. Dr Metzger hent se au ket, ond oh weh, enre halbe Stend, da war des Kitzle he. Ond gar net lnang send se na gessa, Da war des Kitzle au scho gfressa. Des wared nadürlich lauder Gäscht, D’Wirtschafter hend do a weiße West. A ganza Woch isch a langa Zeit Wenn’s vor zwelfe koin Feierobed geit. Ond Montags do send Fraua dra, Do send se alloi ond ohne Ma dia dreibet da om, daß mer koi Staible me fend dr Boda blitzt, daß mr sich dren spiegla kent. Vielen Dank älle dene Wirtschaftsfraua mer müßt en amol a Denkmal baua. Denschtigs, da fangt Wirtschaftwoch a, alls erschts do kommt Abrechnong dra. Do wird älles zählt ond ufgschrieba, en dr Wirtschaft, em Keller ond en der Küche drieba. Dr Bubecks Fritz der schempft oft toll, wenn zviel übrig isch, was er verkaufa soll. Dr Gottfried isch no glei oba duß, sei Gosch got no wia Omnibus. I kas doch net selber fressa! allmachtsrend! was ka denn dafir, wenn Gäscht koin Honger hend. Aber schnell beruhiget se sich no wieder, ond send wieder friedliche Brider. Bis no des Geld zählt isch und älles verkuttelt no wird meischtens no an dr Wirtschaftsführer na bruddelt So goht dr Obend au zu End. De oine send froh, daß se fertig send. Dia andre wo atredat, dia miast no warta, denn Bällesklopfer dia send no beim Karta. Krang ond Kontra, Nullo wär, Herr Wirt ein Cola - bitte sehr! Wirds ganz schpät fangt mr a z’kehra meischtens lasset se sech net störa und stellt mr StÜhl uff dr Tisch na nuff denkt jeder - i hock ja uff oim druff. bis no ois isch oder zwoi no dappet se langsam dr Flecka nai. Mittwochs kommat Schwerathleta da gibts gar net zviel drüber z’reda. De Alt macht aus, hört mr bloß saga nach am Draining wellet mr gar net fraga. D‘r Mailes Kurt isch em Gwicht dr Höchscht als Wirtschafter beinah au dr Bescht. Doch manchmal schempft sei Emma, Heut bleibscht da i richt dir a Schnittmuschter zom rausrädla na! Donnerschtags, da isch Hochbetrieb d’Fußbäller hent da Spielbetrieb. Da wird drainiert Jahrei Jahraus da fliagat au die Scheiba naus, bloß flieget se nemmer nai denn meischtens wills koiner gwese sai! Secht mr no ebbas_und schempft se recht aus, Do hoißt‘s, beim Bier eischenka fliegt mir au koi Scheiba raus No isch mr bedient und sagt nix me em stilla denkt mr, machet doch älles voll he. Freitags isch au ällerhand los Turner, Leichtathleta, kloi ond groß En dr Wirtschaft wernd Karta gschpielt an älle Eck und End dr Wirtschafter von oim Eck ens andere rennt denn heut wird ebes verkonsemiert, De meischte hän jo Zahltag griagt . Da wirds oft schpät nach Mitternacht bei manchem dohoim sei Weib no wacht. Se ganget hoim mit viel Radau wenn mr en der Nähe wohnt, no hört mers genau. Dr oine moint er dät senga, dr andere ka nemme lalla Dr Dritt sagt gar nex, der hot an Balla Samstag Abends isch oft renga. Nachem Rengkampf maischtens Senga. Narr unser Wirtschaft isch beinah zk1oi für alle dia wellet nai. Was da so a Wirtschafter schafft des goht beinah über sei Kraft. Em Gotthilf sei Krügle isch net do wo hent se des denn wieder na? a bar wellet Karta und hent koi Blei, a andrer wills Bier gwärmt, der hot Scheißerei Da sott mer 5 Händ han ond et bloß zwoi aber au des goht wieder vorbei, wenns erscht morgens isch om 1/2 3 Sonntags isch scho bald Betrieb, denn viele hent dr Wandertrieb Dia laufet end Felder naus und en dr Wald en dr Sporthalle machet se no’n halt. na wird dr Frühschoppa tronka, manchmal au me was do älles neus erfahrsch, do bisch he. Wenn no mittags a Fußballspiel isch, no gohts zua da ka koiner saga, er hot sai Rua. En dr Halbzeit wird schiers Büffett gschtürmt, mancher do au ozahlt türmt. Schnaps eischenka, Bier verkaufa, zwölf Zuban und zwoi Stomba zom raucha, 3 Wäffala und a Mohraköpfle, a Frau frogt für ihren Bua nochama Töpfle. Do muß mer sich wondara oft drzua wie dia Wirtschafter behaltet da d’Ruah. Nocham Spiel wirds no gmütlich viele dent sich ama Viertele gütlich. Fußballer selber send et oft do, die ganget en Ad1er oder wo anders na. Mr kann nex macha und kennets net heba aber schö wärs doch, wenn se bei ons bleiba däta. So langsam goht d‘Woch voll z‘End müad and abkämpft dia Wirtschafter send. Jeder hot gnuag zom überkocha und sait: Gottseidank bene fertig für 8 Wocha Manchmal gibts au a gmütliche Woch aber hausa sei nuß mr doch. na isch mr selber dr bescht Kund ond hockt alloi do so mancha Stund. Des isch no au wieder et recht, lieber viel schaffa, denn mir wellet die Schulde doch eba macha. ‚ Oft ärqera hot mer sich müsse, isch net wohr? des wird au sai so em nächste Johr. Aber älles isch ja für en guata Zweck da schluckt mer gern no so a bissle Dreck mar hot au manchmal dra a Freud, des oim no wieder Ufftrieb geit. Ernst Wahler †
Senioren-Stammtisch
Karl Bauer und Emil Schniepp als "Wirte"
|